Բումերանգի օրենքը. Ռուսաստանը ստանում է այն, ինչ արեց Հայաստանի հանդեպ
01.07.2023
Պուտինը հունիսի 28-ին այցելել է Դաղստան և խորհրդակցություն անցկացրել Հյուսիսային Կովկասի դաշնային օկրուգում զբոսաշրջության զարգացման վերաբերյալ։
Ռուսաստանում ծաղրանկարային «ապստամբությունից» մի քանի օր անց Պուտինը որոշել է զբաղվել Դաղստանում զբոսաշրջությամբ։ Ըստ ամենայնի, հաջորդ «ապստամբությունը» սպասվում է Չեչնիայից և Ինգուշիայից, և դրան պետք է պատրաստ լինեն Դաղստանի զբոսաշրջային ենթակառուցվածքները։
Պրիգոժինը «փորձարկեց» Ռոստովի և Վորոնեժի պետական մայրուղիները և գոհ մնաց։ Չեչեն ապստամբներին կարող են անհրաժեշտ լինել այլ ուղիներ:
Դեռևս 2022 թվականի փետրվարի 24-ին Ուկրաինա ներխուժումից առաջ Մոսկվայում կայացած հանդիպման ժամանակ ռեժիսոր Սոկուրովը նախազգուշացրեց, որ Կրեմլի չափից ավելի ինքնավստահ քաղաքականությունը կարող է հանգեցնել նրան, որ Ռուսաստանը վերածվի «Մոսկովիայի»: Ինքը Պուտինը մինչ Պրիգոժինի ապստամբությունը հայտարարեց Ռուսաստանը մասնատելու Արևմուտքի մտադրության մասին. «նրանք Ռուսաստանի փոխարեն ուզում են Մոսկովիա, Սիբիր և այդպես շարունակ»:
Մեծ Բրիտանիայի նախկին արտգործնախարար Լիզ Թրասը Համայնքների պալատում ելույթի ժամանակ կոչ է արել Լոնդոնին և նրա դաշնակիցներին նախապատրաստվել Ռուսաստանի հնարավոր փլուզմանը։ Ինչպես նշում է The Times-ը, բրիտանական կառավարությունը կարծում է, որ Միացյալ Թագավորությունը պետք է նախապատրաստվի Ռուսաստանի Դաշնության անսպասելի փլուզման սցենարին, որպեսզի նման իրադարձությունները Լոնդոնին անակնկալի չբերեն։
Նմանատիպ քննարկումներ՝ բաց թե լատենտ, տեղի են ունենում աշխարհի այլ մայրաքաղաքներում։ Ռուսաստանում հերթական ապստամբությունը համարվում է ժամանակի հարց։ Փորձագետները նշում են, որ դա կարող է տեղի ունենալ Ուկրաինայից ռուսական զորքերի դուրսբերմանը զուգահեռ: Խռովության պատրվակով Վագներն արդեն դուրս է բերվել Ուկրաինայից։ Մնում է կանոնավոր բանակը, և դրա համար հնարավոր է կարող է պետք գակ երկրորդ խռովությունը:
Ռուսաստանը ստանում է այն, ինչ ցանել է Հայաստանում, Արցախում։ Հիմա Ռուսաստանի հետ անում են այն, ինչ նա արել է Հայաստանի հետ՝ չեն թողնում լքել Ուկրաինան՝ «դեմքը պահելով», և վերջնական հարվածը չեն հասցնում՝ հետեւելով «լաբորատոր» Պուտինին, ով իր խոհարարից փախել էր Մոսկվայից: «Գայլից» փախավ, «աղվեսից» կփախչի՞։
Նաիրա ՀԱՅՐՈՒՄՅԱՆ
