Բրյուսելում պարզ դարձավ՝ որ փախստականներին նկատի ունի տիկին վարչապետը

19.07.2023

Տիկին վարչապետի լուսանկարը՝ Էյնշտեյնի պատկերով եւ «Իրերի կապոցը միակ բանը չէ, որ փախստականը բերում է իր նոր երկիր» գրառմամբ, մամուլում ու սոցցանցերում մեկնաբանվեց որպես ակնարկ, որ արցախցիները փախստական են դառնալու։

Աննա Հակոբյանի «լուքն» արվել է Բրյուսելում։ Նա Բրյուսել էր մեկնել Նիկոլի հետ, Միշել-Փաշինյան-Ալիեւ եռակողմ բանակցություններին, որի ժամանակ քննարկվել է նաեւ այսպես կոչված ազերբայդժանեցի փախստականների վերադարձը «արեւելյան ազերբայդժան», այսինքն՝ Հայաստան։ Թեման նոր չէ, բայց Բրյուսելում առարկայանում-«լեգիտիմացվում» է Նիկոլի «հասցեագրմամբ» բանակցությունների միջոցով։

Աննա Հակոբյանը առանցքային դերակատարություն ունի նիկոլական «խաղաղ օրակարգում»՝ իրագործելով հայ հանրության նեյրո-լինգվիստիկ թշնամական կոդավորման «կենցաղային» մասը՝ հայ կանանց երջանկության եւ դասալիք տղամարդկանց առաքելության տեսլականով։

Բրյուսելից հետո Նիկոլն «ինսպեկցիա» է արել Արարատի մարզը։ Մամուլը նկատել է, որ Երասխը դուրս է մնացել այցի ու քննարկումների շրջանակից։ Երասխ-Երեւան-Մարգարա միջանցքի վերաբերյալ խոր ու համապարփակ լռություն է մամուլում, բացի Մարգարայի անցակետի վերանորոգման մասին կցկտուր լուրերից։ Սկզբի համար այս միջանցքի երկարությամբ է նախատեսված ազերբայդժանեցների զանգվածային բնակեցումը, որը շարունակվելու է այլ «ապաշրջափակվելիք» մայրուղիների երկայնքով։

«Ազերբայդժանեցի փախստականները» միայն իրենց կապոցը չեն բերելու, այլեւ՝ այդ մայրուղիների երկայնքով հայ կանանց երջանկությունն ու դասալիք տղամարդկանց՝ հայրենասիրության նոր մոդելով վերափոխումը դոներ քեբաբնոցներում ու այլ «ենթակառուցվածքներում»։

Նիկոլի «ինսպեկցիան» Երասխի իրադարձությունների եւ համայնքի ղեկավարի փոփոխության ֆոնին նշանակում է մեկ բան՝ համայնքները չպետք է դիմադրեն Բաքվի եւ բացառված չէ՝ Անկարայի ներխուժմանը՝ «էկոլոգիական հարցերի», «փախստականների վերադարձի» պատրվակով, եւ որոշակի պահի՝ զինված, Նիկոլին ներքին հարցերում օժանդակելու համար։

Լրագիր