28.05.2023
Թուրքիայի ներկայիս նախագահ Ռեջեփ Թայիփ Էրդողանը նախագահական ընտրությունների երկրորդ փուլի ավարտից հետո մայիսի 28-ի երեկոյան Ստամբուլում ելույթ է ունեցել իր կողմնակիցների առջեւ, հայտնում է TRT Haber հեռուստաալիքը։
«Մեր ժողովրդի բարի կամքով ավարտեցինք նախագահական ընտրությունների երկրորդ փուլը։ Ցանկանում եմ հայտնել ազգիս երախտագիտությունս մեզ ժողովրդավարության տոն պարգեւելու համար»,- ասաց նա։
«Ցանկանում եմ շնորհակալություն հայտնել մեր ազգի բոլոր, առանց բացառության, ներկայացուցիչներին, ովքեր ևս մեկ անգամ մեզ վստահեցին երկիրը ղեկավարելու պատասխանատվությունը հաջորդ հինգ տարիներին, իրենց կատարած ընտրության համար»։
Էրդողանը հավելել է, որ համաշխարհային առաջնորդներն արդեն զանգահարում են իրեն՝ շնորհավորելով հաղթանակի կապակցությամբ։
Anadolu-ի փոխանցմամբ՝ քվեաթերթիկների ավելի քան 98%-ը մշակելուց հետո Էրդողանը Թուրքիայում նախագահական ընտրությունների երկրորդ փուլում հավաքում է ձայների 52,09%-ը։ Ընդդիմությունից նրա մրցակից Քեմալ Քըլըչդարօղլուն հավաքում է ձայների 47,91 տոկոսը։
Ընտրությունների պաշտոնական արդյունքները դեռ չեն ամփոփվել։ Քըլըչդարօղլուն չի ընդունել իր պարտությունը։
Ռեջեփ Թայիփ Էրդողանը Թուրքիայի նախագահն է 2014 թվականից։ Մինչ այդ՝ 2003 թվականից, նա երկիրը ղեկավարում էր որպես վարչապետ։
