Ռուսաստանի շահը

12.10.2020

Ալիեւը Անկարայի աջակցությամբ տապալում է Ռուսաստանի հրադադարի միջնորդությունը, հայտարարել է Հայաստանի վարչապետի գլխավոր խորհրդական, գեներալ Վաղարշակ Հարությունյանը: Նա նշել է, որ նպատակը արցախյան հարցում Թուրքիայի դերը բարձրացնելն ու ռազմավարական հեռանկարում ՌԴ-ին ռեգիոնից ընդհանրապես դուրս մղելն է:


Անկարան իր նպատակը գործնականում չի էլ թաքցնում: Այստեղ հարցը դառնում է այն, թե որոնք են Ռուսաստանի նպատակները: Միեւնույն ժամանակ, կա նաեւ մեկ այլ հարց՝ որքանով է Ռուսաստանն ունակ լինել իր նախաձեռնած գործընթացի տեր, առաջ մղել հրադադարի նախաձեռնությունն ու հասնել դրա ապահովմանը: Ի վերջո, տարօրինակ կլինի մտածել, թե ՌԴ նախագահ Պուտինի մակարդակով ստանձնելով այդ հանձնառությունը, հետեւաբար՝ հետագա իրավիճակի զարգացման համար որոշակի պատասխանատվություն, Կրեմլը չէր պատկերացնում Անկարայի հակազդեցության հնարավորությունը:


Եթե Անկարան սանձազերծել է պատերազմը իր դերը բարձրացնելու համար, ապա միանգամայն պարզ է, որ դերի արձանագրում չլինելու դեպքում նա շարունակելու է պատերազմել: Հարցն այստեղ Ռուսաստանի դերն է, ի վիճակի՞ է Մոսկվան խաղալ այն եւ հասնել նրան, որ Անկարան չհասնի իր նպատակին, բայց հաստատվի կայուն հրադադար եւ սկսի քաղաքական գործընթաց:


Առայժմ դա չի ստացվում, եւ հրադադարի հայտարարությունից հետո Բաքուն չի կանգնել եւ թուրքական աջակցությամբ շարունակում է պատերազմը: Նկատելի չէ, թե ինչ է անում Ռուսաստանը: Լավրովը զանգահարել էր Հայաստանի եւ Ադրբեջանի արտգործնախարարներին, հետո Չավուշօղլուն զանգահարել է Լավրովին: Հոկտեմբերի 12-ին Հայաստանի արտգործնախարարի հետ հանդիպմանը Սերգեյ Լավրովը հայտարարել է, թե շփումները հրադադարի հասնելու ուղղությամբ շարունակվում են:


Ու՞մ հետ, ինչպես, ինչ բովանդակությամբ: Դրանք հարցեր են, որ չունեն պատասխան:


«Եթե չեն ուզում լսել Լավրովին, ապա կլսեն Շոյգուին», անցնող օրերին բաց թողեց ռուսական քարոզչությունն իր ապոլոգոտների շուրթերով: Կլսե՞ն Շոյգուին: Իսկ ի՞նչ կարող է ասել Շոյգուն, որպեսզի Անկարան լսի նրան: Եվ արդյո՞ք Շոյգուն մնացել է ռեգիոնում Ռուսաստանի վերջին հույսը: Եթե այո, ապա դա գուցե այնքան էլ լավ չէ, եթե Կրեմլը Կովկասում մոտեցել է «վերջին հույսին»:


Կարո՞ղ է Մոսկվան սկսել արագորեն հեռանալ «վերջին հույսի» կետից եւ ձեռնամուխ լինել Կովկասում արդյունավետ քաղաքական դերի:


ՀԱԿՈԲ ԲԱԴԱԼՅԱՆ

«Լրագրի» մեկնաբան

Բոլոր իրավունքները պաշտպանված են: Yerevan.Online-ի հրապարակումների մասնակի կամ ամբողջական օգտագործման ժամանակ հղումը կայքին պարտադիր է: Կայքում արտահայտված կարծիքները կարող են չհամնկնել խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

0012 Երևան, Հ. Քոչարի 16

Էլ. հասցե՝ yvnonline@gmail.com

Գլխավոր խմբագիր՝ Աննա Սարգսյան