16.09.2020
Պետական մակարդակով կքննարկենք Կոնդ թաղամասի քաղաքաշինական խնդիրները, կկատարվի բազմակողմանի ուսումնասիրություն՝ պատմաճարտարապետական, տնտեսական, սեյսմիկ և այլ ուղղություններով,- հայտարարել է փոխվարչապետ Տիգրան Ավինյանը։
Հիշեցնենք, որ նախօրեին ՌՈՒՑՈԳ-ինվեստ ընկերությունը ֆիլմ էր ներկայացրել հանրությանը՝ Կոնդի ներկայիս անմխիթար վիճակի և դրա վերակառուցման իր ծրագրի մասին, որը մեծ մասամբ դրական էր ընդունվել հանրության կողմից։
Միաժամանակ, Ավինյանի խոսքով, Կոնդ թաղամասի զարգացման հստակ հայեցակարգ է մշակվելու, որի նպատակն է պահպանել մեր մայրաքաղաքի հնագույն թաղամասերից մեկի պատմաքաղաքաշինական միջավայրը և շունչը:
«Այս ամենի արդյունքում մենք ունենալու ենք «վերակենդանացած» թաղամաս Երևանի սրտում: Միաժամանակ, ակնկալում ենք լոկալ տնտեսության և զբոսաշրջության ակտիվացում, ճարտարապետության, ենթակառուցվածքների և սպասարկման որակի բարձրացում, նաև աշխատատեղերի ստեղծում»,- հայտարարել է նա։
Նշվել է, որ այսօրվա քննարկման բուն բովանդակությունը վերաբերելու է Կոնդի նոր հայեցակարգային էսքիզ-նախագծի մրցույթին: Մասնագիտական հանրույթի և մի շարք անհատ ճարտարապետների քննարկմանը ներկայացնելու հետո վերջիններիս առաջարկությունների և դիտողությունների հիման վրա կատարվել են համապատասխան փոփոխություններ, նախագիծը լրամշակվել է:
«Աշխատանքային խմբի կողմից մրցույթի նախագծի քննարկումից ու վերջնական հաստատումից հետո Կոնդ թաղամասի ամբողջական և միասնական զարգացման հայեցակարգի մշակման նպատակով կհայտարարվի բաց միջազգային մրցույթ»,-ասել է Ավինյանը։
