«Համո Սահյանն ասաց». մեծ բանաստեղծի հանճարեղ ասույթները


-Անընդհատ զարմանում եմ ցորենի հրաշքի վրա,- ասաց Համո Սահյանը:- Էդ մասին բանաստեղծություն էլ եմ գրել: Պատկերացրու, ցորենի մի հատիկը քանիսն է դառնում: Հլա դարերի միջով այդ մի հատիկը տար, բազմացումը տես՝ մեկը քանիս է դառնում: Հետո այդ հատիկի մեջ հողը տես, արևի ճառագայթը, ջուրը, մարդու աշխատանքը տես: Հետո մարդուն կերակրելը տես… Այդ ինչ հրաշք է… Ցորենի հատիկը մի աշխարհ է:


10-ը թիվը


-Մարդ մի 10 տարի էլ կարողանար գրել ու 10 մնայուն բանաստեղծություն ունենար,- ասաց Համո Սահյանը:- Հերիք էր:


Ի՞նչ է քննադատությունը


-Գրականությունը, արվեստը միրգ են,- ասաց Համո Սահյանը:- Համեղ, հյութեղ: Գրողներն ու արվեստագետները այդ միրգը ստեղծողներն են: Իսկ քննադատը դանակով կտրում է միրգն ու բացատրում՝ սա կեղևն է, սա՝ հյութն ու մարմինը, միս ու արյունը, սա կորիզը, սա… Էդ չի՞ քննադատությունը: Բա ինձ պե՞տք է քչփորել միրգը:


Սերնդի արժանիքներից մեկը


-Հիմա մեր սերնդի գրողներին չեն հավանում,- ասաց Համո Սահյանը:- Բայց եթե ուրիշ ոչ մի արժանիք էլ չունենա մեր սերունդը, գոնե հայոց լեզուն հո մաքրե՞ց 20-40-ական թվականների արևելյան (հատկապես) ու արևմտյան օտարաբանություններից, դարձրե՞ց զտված, գեղեցիկ, գրական լեզու, Տերյանի լեզու:


Այսպիսի մի պատասխան


-Վերջին տարիներին բոլորը միաբերան բողոքում են, թե հայի տեսակը փոխվում է. մարդիկ ընչաքաղց են դարձել, լալկան, խաբեբա, կեղծավոր, անգութ, հոգևոր արժեքները չեն գնահատում:


-Մարդուն մի դրեք անմարդկային պայմանների մեջ ու հետո պահանջեք, որ մարդկային մնա,- ասաց Համո Սահյանը:- Վերացրեք պատերազմը, շրջափակումը, սովը, ցուրտը, մութը, և մարդը դարձյալ մարդկային կլինի:


Երկխոսություն


-Միշտ նախանձել եմ գրչի մարդկանց, վարպետ,- ասաց Տիգրան Մանսուրյանը,- գրողներին:


-Աշխարհի մեծագույն բանը որ գիտեմ, երաժշտությունն է,- պատասխանեց Համո Սահյանը:


Անհետացող բառեր


-Ժողովրդի կենցաղից գութանի վերանալուց հետո հայոց լեզվից երկու հարյուր բառ անհետացավ,- ասաց Համո Սահյանը:

Խնդրեցի թվարկել այդ բառերը:


-Գութան, մաճ, խոփ, լուծ, եզ, վեցկի, ակոս, մաճկալ…,- թվեց ու ավելացրեց:- Երկու հարյուր բառից էլ շատ անհետացավ:


Հավաքեց Հովհաննես Այվազյանը

Անդին 4, 2013

Բոլոր իրավունքները պաշտպանված են: Yerevan.Online-ի հրապարակումների մասնակի կամ ամբողջական օգտագործման ժամանակ հղումը կայքին պարտադիր է: Կայքում արտահայտված կարծիքները կարող են չհամնկնել խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

0012 Երևան, Հ. Քոչարի 16

Էլ. հասցե՝ yvnonline@gmail.com

Գլխավոր խմբագիր՝ Աննա Սարգսյան