top of page

Հերթական ավանտյուրան. «Սեպուհ» ավտոմեքենան իրականում կորեական SsangYong է

16.07.2023



Երեկ էկոնոմիկայի նախարար Վահան Քերոբյանը ներկայացրեց «Սեպուհ» ավտոմեքենաները՝ ավտոմոբիլային ոլորտում ազգային նվաճումների մասին ակնարկելով։


Սակայն Yerevan Online Magazine-ը պարզել է, որ այս նորույթն իրականում ոչ մի հայկական մեքենա էլ չէ։


«Սեպուհ» ավտոմեքենան կիսաքանդված տեսքով գալիս է Կորեայից՝ SsangYong Motor Company-ից։


Փոքրիկ արտադրամասը, որն ավտոմոբիլային գործարան է ներկայացվում, իրականում ներմուծվող մասերի հավաքման վայր է Երևանի Նոր Նորքում:


«Հայաստանում արտադրվող «Սեպուհ 1» ավտոմեքենաներն արդեն պետական հաշվառում են ստանում»,– տեսանյութին կից գրել էր Վահան Քերոբյանը՝ փորձելով տպավորություն ստեղծել, որ այդ մեքենաներն ամբողջությամբ ստեղծվել և մշակվել են Հայաստանում։


Սեպուհ մակնիշի ավտոմեքենան որպես հայկական ավտոմեքենա ներկայացնելը երկրում ավտոմոբիլային արդյունաբերության մասին ապակողմնորոշիչ պատկեր է ստեղծում։ Ավելին, պետական բարձր պաշտոնյայի կողմից կիրառվող այս պրակտիկան կարող է վնասել Հայաստանի հեղինակությանը և ծիծաղի առարկա դարձնել երկիրը։


Հայկական մեքենաների քողի տակ ներկրվող մեքենաներ ստեղծելու և գովազդելու փոխարեն Հայաստանը պետք է ձգտի զարգացնել սեփական տեխնոլոգիաներն ու արտադրական կարողությունները։ Հայաստանն ունի ավտոմոբիլային արդյունաբերությունը զարգացնելու և իսկապես հայկական մեքենաներ ստեղծելու ներուժ։ Այնուամենայնիվ, դա պահանջում է ներդրումներ, հետազոտություն, մշակում և տրանսպորտային միջոցների ծագման ազնիվ ներկայացում:


Եվ լավ կլինի, որ էժանագին մանիպուլյացիաների փոխարեն կառավարությունը զբաղվի սրան միտված ռազմավարության մշակմամբ:


Ի դեպ, այս համատեքստում ամոթ չլինի հետաքրքրվել՝ ի՞նչ եղան Հայաստանում «տնտեսական հեղափոխության» շնորհիվ բացված վերելակների գործարանը, հեռուստացույցեր հավաքելու գործարանը և փոքր ինքնաթիռների գործարանը:

ԱՄՆ-ում բուժվող Պարգև Սրբազանը՝ տարօրինակ պատերազմի, չկոտրվելու, պատմության ու ապագայի մասին

bottom of page