Վարդգես Մանուկյանի աշխարհը

05.05.2020, ԵՐԵՎԱՆ

Yerevan.Online-ի՝ «10 հարց հետաքրքիր մարդուն» նախագծի հյուրը կինոօպերատոր Վարդգես Մանուկյանն է։


- Ո՞վ եք դուք։


-Ես Վարդգես Մանուկյանն եմ 😊😊😊 Ես մարդ եմ, որ փորձում է իր արվեստի ուժի սահմաններում աշխարհին տալ իր գույները։


- Մանկության ո՞ր պահին առաջին անգամ զգացիք Ձեր ինքնագիտակցությունը։


- Հինգ կամ վեց տարեկանում, առաջին անգամ, երբ ինձ բակում նեղացրեցին (նշեմ, որ մեծացել եմ Երրորդ մասի բակերից մեկում 😊), բարձրացա տուն, որպեսզի մորս բողոքեմ։ Նա ինձ ասաց, որ ես ինքս պետք է լուծեմ իմ խնդիրները, որովհետև տղա եմ։ Եվ այդ ժամանակ ես հասկացա, որ ես շրջապատված եմ շատ լավ մարդկանցով, սակայն, միևնույն ժամանակ, միայնակ եմ աշխարհում։


- Ինչպիսի՞ն է երջանկությունը։


- Երջանկություն է, երբ դու կարողանում ես միաձուլվել Աստծո, բնության և արևի հետ։ Այդպիսով դու աշխարհի բոլոր մարդկանց կարող ես հասկանալ և հասկացնել քո լեզուն։


- Ինչի՞ն չի հերիքում Ձեր համարձակությունը։


- Ստել կնոջս 😊


- Որո՞նք են հայության առաջ կանգնած գլխավոր խնդիրները։


- Հավատի պակասը, բնության հանդեպ անխնա վերաբերմունքը և միմյանց հանդեպ նախանձի զգացողությունը։


- Ո՞վ է բոլոր ժամանակների մեծագույն հայը և ինչու։


Դժվար է առանձնացնել կոնկրետ մեկին։ Մեծագույն է այն մարդը, որը իրենից հետո թողնում է աշխարհին կամ իր երկրին գիտելիք, արվեստ կամ այլ ժառանգություն։


- Ո՞ր գիրքին, ֆիլմին և երգին պետք է ծանոթ լինի ամեն մարդ։


- Գիրք - Աստվածաշունչ

Ֆիլմ - «Բախելով երկնքի դռները» (Knocking on heaven’s door)

Երգ – Michael Jackson, We Are the World


Շեշտեմ, որ չափազանց դժվար է առանձնացնել կոնկրետ մեկ լավագույն գիրք, երգ կամ ֆիլմ։ Լավագույնները շատ-շատ են։


- Ո՞րն է Ձեր ամենատարօրինակ տաղանդը։


- Երգելն ու բանաստեղծություններ գրելը (բայց սա մեր մեջ 😊), նաև ընտիր նարգիլե եմ պատրաստում։


- Ի՞նչն է Ձեզ հիասթափեցնում։


- Հարազատ մարդկանց սուտը և անգնահատ լինելու զգացողությունը։


- Ինչպե՞ս բացատրել հիմարին, որ նա հիմար է։


- Հիմարին պետք չէ բացատրել, որ նա հիմար է։ Հարկավոր է պարզապես լսել նրան, որպեսզի նա էլ իրեն կարևոր զգա։

Բոլոր իրավունքները պաշտպանված են: Yerevan.Online-ի հրապարակումների մասնակի կամ ամբողջական օգտագործման ժամանակ հղումը կայքին պարտադիր է: Կայքում արտահայտված կարծիքները կարող են չհամնկնել խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

0012 Երևան, Հ. Քոչարի 16

Էլ. հասցե՝ yvnonline@gmail.com

Գլխավոր խմբագիր՝ Աննա Սարգսյան