«Վիրուս» ֆիլմն ու պատերազմը
- 24 февр. 2021 г.
- 2 мин. чтения
24.02.2021, Երևան
Մարտի 8-ին կինոսեր հասարակությանը հետաքրքիր իրադարձություն է սպասվում. մեծ էկրաններին է դուրս գալիս տաղանդաշատ կինոռեժիսոր Նադի Իսպիրյանի նոր ֆիլմը՝ «Վիրուս»։ Yerevan.Online-ին ռեժիսորը պատմեց.
- Ֆիլմի միտքը ծագեց պանդեմիայի սկսվելու ժամանակ, չնայած կոնկրետ կորոնավիրուսի հետ այն կապ չունի: Ես իմ էությամբ այնպիսի մարդ եմ, որ անգամ ամենաճգնաժամային ժամանակներում պետք է զբաղմունք ունենամ և հավատարիմ մնամ իմ սիրելի ռեժիսուրային։ Մտածեցի ստեղծել այնպիսի ֆիլմ, որն անգամ այդ դժվարին ժամանակներում պահանջված կլինի և չի պահանջի մեծ ծախսեր: 2020 թվականի աճպարարությունների մասին երևի տեղյակ չեն միայն այլ մոլորակներում, սակայն ով գիտե, միգուցե այնտեղ ավելի զարգացած են և լավ էլ հետևում են մեր մոլորակի լուրերին (ծիծաղում է – խմբ.): Ֆիլմի թրեյլերում գաղտնիքները չեմ բացահայտում, խոստանում եմ, որ այն կլինի խորն իմաստով և տպավորիչ:
- Ովքե՞ր հովանավորեցին ֆիլմը։
- Հովանավոր գտնելը հեշտ չէր... Բոլորն ասում էին «ինչ էլ ժամանակ եք գտել ֆիլմ նկարելու», բայց իմ նպատակասլացությունը թույլ չտվեց, որ հետ մնամ այդ տեսակի անհավատ խորհուրդներից, և ես մտածածս արեցի: Մեր ֆիլմի գլխավոր հովանավորներն են` Էկոֆորմ ընկերությունը (արտադրում է ալկոգելեր, իսկ վիրուսի համար դա անհրաժեշտ պրոֆիլակտիկա է): Մյուսը STRATA motors-ն է` Ամերիկայի Միացյալ Նահանգներից: Կան նաև բարի մարդիկ, որոնք պարզապես ցանկացան իրենց ներդրումն ունենալ հայկական ֆիլմում:
- Պատերազմը չխանգարե՞ց նկարահանումների ընթացքին։
- Երբ պատերազմ սկսվեց, ֆիլմս կիսատ մնաց... Այդ օրերին չենք արել նկարահանում... Հովանավորության համար էլ այդ օրերին դիմելը սխալ կլիներ։ Հետո ձմեռ սկսվեց և սցենարային փոփոխություններ արեցի, որ էլ չձգձգվեր։ Քանի որ սցենարով ամառ պետք է լիներ, փոփախություններն պարտադիր էին: Սառայի (գլխավոր հերոսուհի) ամուսինը սցենարով գնացել է պատերազմ: Պատերազմի թեման շոշափվել է ֆիլմում : Ֆիլմի "I will fight" երգը կատարել է սիրված երգչուհի Շպռոտը: Երաժշտության և գործիքավորման հեղինակ` Վազգեն Կոլոյան, տեքստը՝ Լիլի Համբարձումյանի: «ՎԻՐՈՒՍ»-ը առաջին գեղարվեստական լիամետրաժ ֆիլմն է Հայաստանում, որտեղ ամբողջ ֆիլմի ընթացքում խաղում է մեկ դերասանուհի: Աշխատել ենք փոքր, բայց պրոֆեսիոնալ և ջերմ թմով: Եթե սկսեմ իրենց գովել, հարցազրույցը երկար կտևի: Ֆիլմը այն մասին է, որ մարդն ինքն է իրեն օգնում հենվելով իր անցյալի վրա, ապրելով ներկայում և հավատալով իր ապագային: Ֆիլմի պրեմիերան կկայանա մարտի 8-ին «Մոսկվա» կինոթատրոնում, այն կցուցադրվի Երևանի «Մոսկվա», «Նաիրի», Գյումրիի «Հոկտեմբեր» կինոթատրոններում և Վանաձորի «Լոռի» ժամանցային կենտրոնում:
Զրուցեց Միքայել Հարությունյանը
