Տանից դուրս՝ միայն անձնագրով


Հայաստանում այսօրվանից գործում են նոր սահմանափակումներ: Տեղեկությունն իր ուղերձում հայտնեց ՀՀ վարչապետ Նիկոլ Փաշինյանը:


«Սա նշանակում է, որ հազարավոր ձեռնարկությունների աշխատանքը դադարեցվելու է և թույլատրվելու է միայն կենսական անհրաժեշտ մեր կազմակերպությունների գործունեությունը, և մարդկանց միայն կենսական անհրաժեշտության տեղաշարժը:


Փողոց դուրս եկած քաղաքացիները պետք է հստակ բացատրություն ունենան, թե ուր են գնում, և այդ բացատրությունը պետք է տեղավորվի կենսական անհրաժեշտության տրամաբանության մեջ»,- ասաց Փաշինյանը:


Բացի այդ, նրա խոսքով, մարտի 25-ից տնից դուրս եկող ցանկացած քաղաքացի իր մոտ պետք է ունենա անձը հաստատող փաստաթուղթ և տեղաշարժի ձևաթուղթ, որի օրինակը կսահմանի պարետատունը:


Փաշինյանը նշեց, որ պետք է մաքսիմալ լրջությամբ վերաբերվել այս իրավիճակին, երկու հոգուց ավելի չհավաքվել անգամ բակերում ու զրուցարաններում։ «Այս ամենն արվում է ձեր ծնողների, տատիկ–պապիկների անվտանգությունն ապահովելու համար»,-ասաց վարչապետը։


Քաղաքացիները հնարավորություն են ունենալու այցելել բանկեր, խանութներ, դեղատներ, բայց վարչապետը կոչ արեց  առավելապես օգտվել օնլայն ծառայություններից։


Վարչապետը կոչ արեց գյուղացիներին ակտիվորեն զբաղվել գարնան գյուղատնտեսական աշխատանքներով, իսկ տանը մնացողներին հորդորեց կարդալ, ինքնակրթվել, վատ սովորությունները թարգել, մասնավորապես` ծխելը։


«Կորոնավիրուսը չար մշուշի պես կանցնի, ու կմնա այն ապագան, որը կառուցում ենք մեր մտքներում։ Այնպես որ, գլուխներդ բարձր։ Սա վերաբերվում է հատկապես այն բժիշկներին, որոնք կռիվ են տալիս այս հիվանդության դեմ»,–ասաց նա` շնորհակալություն հայտնելով ուժային կառույցների աշխատողներին և զինվորներին։


Նա տեղեկացրեց նաև, որ կառավարությունը 25 մլրդ դրամ կտրամադրի սոցիալական փաթեթին։

Նշենք, որ մարտի 24-ի ժամը 19:00-ի դրությամբ Հայաստանում կորոնավիրուսով վարակման 249 դեպք է արձանագրվել, որոնցից 30 հիվանդ թոքաբորբ ունի, 5-ն ինտենսիվ թերապիայի բաժանմունքում են, 77 տարեկան մեր հայրենակցի վիճակը ծայրահեղ ծանր է, 4-ի վիճակը բժիշկները գնահատում են ծանր:

Բոլոր իրավունքները պաշտպանված են: Yerevan.Online-ի հրապարակումների մասնակի կամ ամբողջական օգտագործման ժամանակ հղումը կայքին պարտադիր է: Կայքում արտահայտված կարծիքները կարող են չհամնկնել խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

0012 Երևան, Հ. Քոչարի 16

Էլ. հասցե՝ yvnonline@gmail.com

Գլխավոր խմբագիր՝ Աննա Սարգսյան