02.08.2023
Հուլիսի 30-ին հայր և որդի Արմեն և Սերգեյ Սմբատյանները երկամսյա ժամկետով ձերբակալվել են խարդախության կասկածանքով՝ պետությանը զգալի ֆինանսական վնաս պատճառելով։ Գլխավոր դատախազության հրապարակած մանրամասները սահմանափակ են, ինչպես ընդունված է նման դեպքերում։ Իսրայելում Հայաստանի նախկին դեսպան Արմեն Սմբատյանը և նրա որդին՝ ճանաչված դիրիժոր, ՅՈՒՆԻՍԵՖ-ի ազգային դեսպան Սերգեյ Սմբատյանը մեղադրվում են «Գրքի աշխարհ» նախագծի հետ կապված խարդախ ներդրումային սխեմայի մեջ։
Քննությունը պնդում է, որ խարդախ սխեմայով նրանք ձեռք են բերել 300 քմ հողատարածք, որը պատկանել է Չայկովսկու երաժշտական դպրոցին։
Բացի այդ, Արմեն Սմբատյանին մեղադրանք է առաջադրվել մշակույթի և երիտասարդության հարցերի նախկին նախարար Հասմիկ Պողոսյանի չարաշահումներին օժանդակելու և գույքը օրինականացնելու նպատակով փողերի լվացման համար։ Ինքը՝ Հասմիկ Պողոսյանը, ներկայումս գտնվում է Հայաստանից դուրս։
Նույն ընտանիքից հայր և որդի Սմբատյանների ձերբակալության հանգամանքները մտահոգություն են առաջացնում: Ընտանիքի անդամներին միասին ձերբակալելը ցուցմունքներ ստանալու նպատակով նույնիսկ խորհրդային տարիներին համարվում էր էթիկայից դուրս։ Թեև Խորհրդային Հայաստանում արդարացումները հազվադեպ էին, իրավապահ համակարգը հիմնականում ռեպրեսիվ էր:
Անկախ Հայաստանում՝ հին, թե կեղծ նոր, շարունակելով խորհրդային խայտառակ իներցիան, աղմկահարույց գործերով կանխարգելիչ միջոցառումները լուծվում են ոչ միայն իրավական դաշտում, այլ քաղաքական նկատառումների ազդեցության տակ, հատկապես երբ խոսքը վերաբերում է «նախկին» իշխանություն կամ գործիչ համարվող անձանց: Եվ թեև հայրն ու որդին հայտնի են եղել քաղաքական հարցերում իրենց կոնֆորմիզմով և շողոքորթել են բոլոր իշխանություններին, մեծարել նրանց տիկնանց, նրանք այժմ հայտնվել են ճաղերի հետևում:
