top of page

Ինչո՞ւ ենք մենք այդքան մեծ շուքով տոնում Նոր տարին՝ երկրորդ պլան թողնելով գլխավոր տոնը՝ Սուրբ Ծնունդը

01.01.2024



Ոչ բավականաչափ լուսավորյալները նոր տարվա գիշերը դիտում են որպես պարզ ուրախության ժամ: Նրանք չեն գիտակցում ժամը 12-ի աստվածային խորհուրդը ու չեն կարևորում այն:


Օրինակ Նյու Յորքում տուրիստները հավաքվում են Թայմզ Սքուեյրում, որտեղ հաստ ձողի վրայով դանդաղ դեպի ներքև է իջնում բյուրեղապակե կտորներից կազմված թանկարժեք գունդը:


Քեֆ են անում 12-ից մինչև ժամը 1-ը կամ 2-ը, հետո գնում քնելու: Առավոտյան բոլորն աշխատանքի են: Օրը սովորական է:


Լոսում նույնն է` բացառությամբ հայերի և ռուսների: Դրանք հայոց ազգային սրբազան ծեսերին են հետևում:


Ու այդպես` ամենուր: Առանց որևէ հատուկ պատրաստության` փարթի նայթ, հետո` շուտ քնելու:


Քրիստոնյա քաղաքակիրթ աշխարհում տարեվերջին համընկնող իրական տոնը Սուրբ Ծնունդն է: Արևմուտքում և այլուր այն սրբազան տոն է` Հիսուսի ծննդյան օրը, որին պատրաստվում են ընդամենը միմյանց նվերներ առնելով և խիստ նեղ ընտանեկան սեղանի շուրջ երեկոյան ընթրելով:


Առավոտյան էլի սովորական օր է:


Ռուսաստանը միշտ է տոնամեռ և տոնամոլ եղել: Ամենշաբաթյա հսկայական համերգները ռուս էստրադայի սնմակարդակ և գրոտեսկային աստղափոշիների մասնակցությամբ` օրինակ:


Օղին կա, սելյոդկային փոխարինած սաղմոնը կա` ուրեմն տոն է: Ամեն օր: Անգամ երբ իրենց օկուպանտ զավակները շունչներն են փչում ճակատում:


Նախքան հեղափոխությունը Ռուսաստանում ևս Սուրբ Ծնունդն էր տոնը: Իհարկե շատ ավելի շքեղ քան հիմա:


Գալով իշխանության` բոլշևիկները, Սուրբ Ծննդյան տոնից կտրելու համար ամբոխին, հորինեցին հունվարի մեկը ոուպես ամենագլխավոր տոն: Սահմանեցին հսկա հանգստյան ժամկետ և սկսեցին տարածել այդ բոլշևիկյան տենդենցը` նաև իրենց գաղութներում: Օրինակ` Հայաստանում:


Ու մենք, որպես պաշտոնապես առաջին քրիստոնյա ազգ, շատ արագ մոռացանք Քրիստոսի ծննդյան տոնն ու ազգային սրբազան տոն դարձրինք Նոր Տարին:


Հայկական Կաղանդ պապը («Տարեսկզբի պապ») կամ անգամ Սանտա Կլաուսը, որ Սուրբ Նիքոլասն է` կիլիկեցի հույն կամ գուցեև հայ Նիկողայոսը, դարձավ ռուս մուժիկ Ձմեռ պապ: Որ հանկարծ սուրբ չլինի ու հանկարծ Արևմուտքի հետ ոչ մի առնչություն չունենա: Լինի մառոզ` «Սառնամանիք Պապ»: Ինչպես Սիբիրում: Կամ թյուրքերի նախահայրենիք ռուսական Ալթայում:


Որպես ընտանեկան արժեքների կրող բացառիկ սեքսուալության տեր կանանց ազգային սիմվոլ` ռուսները հնարեցին նաև «Ձյունանուշիկին» ու բոլորին` սեփական բատրակներին թե վասալ ճորտերին հրամայեցին սաստիկ ուրախանալ երեսունմեկի գիշերը:


Որպես խիստ ավանդապահ և հյուրասեր` Հայաստանն անմիջապես այդ տոնին ավելացրեց ահռելի առևտրի անհրաժեշտությունը, խոզի բդի ու ոչ միայն բդի պաշտամունքը:


Լակելն ու մոլի լափելը օրվա պարտադիր բաղկացուցիչն են: Ուրախանալը` պարտադիր հոգեվիճակը:


Սովետը կարծես թե չկա, բայց բոլշևիզմը հիմա արդեն համակարգային է դարձել ու ստամոքսի աստվածության պայմաններում Քրիստոս աստծո ծնունդը ձևական փոքրիկ մի բան է, իսկ օրացուցային օրվա և տարվա փոխվելը` ամեն ինչ` ազգային տոն, սրբազան մի ծես, պարտադիր մի խորհուրդ:


Եվ սկսվում են ավելի շատ կորուստներով ու մահերով լեցուն լինելիք գալիք տարվա համար հրաշափառ մաղթանքները, երջանկություն, ծափ, ծիծաղ, մոլագար պար, քեֆ ու ուրախություն:


Իսկ առավոտից փոխայցելություններ: Վատագույն դեպքում` զանգեր: Նվերներով, խմիչքներով, վարկով կամ անվարկ վերցված գումարներով փռված պայթող սեղաններով ուղեկցվող պարտադիր լափով և չգիտես ինչ խորհուրդ ունեցող մոլի տոնակատարությամբ:


Ու ամեն տարի` երկրի կործանմանը զուգահեռ` քեֆն ավելի է սաստկանում:

Այս տարին առավել ճոխ է լինելու: Չի կարող բոլշևիկների հանրույթը բոլշևիկաբար չտոնել սեփական հայրենիքի վաճառքը, սեփական ազգի գաղթականությունն ու սեփական ապագայի այլևս անվերադարձ կորուստը:


Չի կարելի չտոնել ահռելի զոհերի թարմ գերեզմանները, առաջիկա կորուստներն ու այս գալիք տարվա զոհերը:


Չի կարելի: Բա երեխաները՞: Ինչ անում է հանրույթը` երեխաների համար է անում: Որ նրանք անհոգ և ուրախ մեծանան և դեգեներատությամբ գերազանցեն իրենց ծնողներին:


Ուրեմն շնորհավոր սրբազան Նոր տարի, տավարիշչ ժողովուրդ իմ: Քեզ ավելի ավելի շատ նիկոլներ եմ մաղթում ու այն ամենն ինչ այս տարի ինքդ ես դու սիրով տոնում:


Ս նովիմ գոդոմ, ս նովիմ սչասծյեմ ...


Հայկ Մարտիրոսյան

Comments


«Քոչարյանին ասացի՝ ժողովուրդը ձեզ ատում է». Հարութ Սասունյանը՝ Քըրք Քըրքորյանի համեստության, մեր անփառունակ ոչ վաղ անցյալի և վտանգավոր ներկայի մասին | «Զրույցներ հայության մասին»

bottom of page