22.06.2023
ՀՀ քննչական կոմիտեում քննվող քրեական վարույթի շրջանակներում ձերբակալվել, ապա կալանավորվել Կարինե Ղուկասյանը:
Armtimes.com-ի տեղեկություններով նա «Հանրային ձայն» կուսակցության նախագահ Վարդան Ղուկասյանի (հանրությանը առավել հայտնի «Դոգ» մականվամբ) քույրն է։
Եվս մեկ քույր կալանավորվել էր մեկ ամիս առաջ: Դոգը հայտարարել էր, որ չի ճանաչում այդ քրոջը:
Ըստ ամենայնի, Դոգն արդեն այնքան է ձանձրացել նմանօրինակ քրերի կալանավորումներից, որ այսօրվա ուղիղ եթերի ժամանակ առհասարակ չի անդրադարձել այս թեմային:
Մինչդեռ ՔԿ խոսնակի փոխանցմամբ՝ նախաքննությամբ փաստական տվյալներ են ձեռք բերվել այն մասին, որ Կարինե Ղուկասյանը մտերիմ-անձնական կապերի մեջ է գտնվել ոստիկանության Երեւան քաղաքի վարչության համապատասխան ծառայության աշխատակցի հետ եւ սոցիալական ցանցի հավելվածի միջոցով նրանք հաղորդակցվել են, որի ընթացքում Կարինե Ղուկասյանը, խնդրելու եւ համոզելու եղանակով դրդել է ոստիկանության ծառայողին իրեն տրամադրել ֆիզիկական անձի անձնական, հրապարակման ոչ ենթակա, ուղղակի կերպով անձին նույնականացնող տեղեկություններ։
«Պաշտոնատար անձը, հանցավոր համաձայնության գալով Կ․ Ղուկասյանի հետ՝ օգտվելով իրեն հասանելի ՀՀ կառավարման մարմինների շտեմարաններից, տեղեկությունները տրամադրել է Կ․ Ղուկասյանին։ Ձերբակալելուց հետո վերջինիս ներկայացվել է մեղադրանք ՀՀ քրեական օրենսգրքի 46-204-րդ հոդվածի 3-րդ մասի 1-ին կետով, իսկ ոստիկանության ծառայողին՝ ՀՀ քրեական օրենսգրքի 204-րդ հոդվածի 3-րդ մասի 1-ին կետով (բազմաթիվ դրվագներով)»,- մանրամասնեց Աբրահամյանը։
ՔԿ մամուլի խոսնակի տեղեկացմամբ՝ Կարինե Ղուկասյանի ձերբակալումից հետո միջնորդություն է ներկայացվել դատարան նրա նկատմամբ կալանքը որպես խափանման միջոց ընտրելու վերաբերյալ, որը 22․06․2023թ․-ին դատարանի կողմից բավարարվել է եւ նա կալանավորվել է։
Նա նաեւ հայտնեց, որ ոստիկանության ծառայողի նկատմամբ ավելի վաղ, եւս որպես խափանման միջոց է ընտրվել կալանքը՝ ՀՀ քրեական օրենսգրքի նույն հոդվածով նախատեսված այլ հանցավոր արարքներ կատարելու համար:
