29.04.2024
Լեհ դրամատուրգ Սլավոմիր Մրոժեկի «Տունը սահմանին» ստեղծագործությունը մեր ժամանակների Հայաստանի խնդիրները արտացոլող հայելի է։ Սյուժեն կենտրոնանում է մի ընտանիքի վրա, ով հայտնաբերում է, որ իրենց տունը դարձել է աշխարհաքաղաքական ինտրիգների առարկա և հայտնվում է մի քանի երկրների սահմանին։ Իրավիճակը, որը հեղինակը ներկայացնում է հումորով և սարկազմով, իրականում ժամանակակից հայկական դաժան իրականության պատկերն է։
Գյումրու դրամատիկական թատրոնում պիեսի բեմադրությունն ուղեկցվում է վառ ու հիշարժան կերպարներով, հատկապես` Հասմիկ Սուվարյանի, Վալենտին Պետրոսյանի և Արկադի Ղարագուլյանի կատարմամբ:
Պիեսը, թեև գրվել է տասնամյակներ առաջ, բայց արդիական է մնում այսօր։
Իրավիճակի անհեթեթությունը, որում հայտնվել են հերոսները, արտացոլում է քաղաքական առաջնորդների քայլերը և դրանց ազդեցությունը հասարակ մարդկանց կյանքի վրա։ «Տունը սահմանին» ներկայացման դրամատուրգիան բացահայտում է քաղաքական խաղերի ու ինտրիգների արդյունք դարձած բաժանման, տան ու ունեցվածքի կորստի խնդրի խորությունը։
Ժամանակակից Հայաստանի համատեքստում, որտեղ իշխանությունը որոշումներ է կայացնում սահմանամերձ հողերը ոչնչի դիմաց թշնամուն հանձնելու վերաբերյալ, պիեսի թեման հատկապես արդիական է դառնում։
Այս ֆոնին տարօրինակ են հնչում ռեժիսոր Արտուշ Միքայելյանի խոսքերն այն մասին, որ ներկայացումը «չի փորձել ներկայացնել հայկական իրականությունը»:
Գյումրու դրամատիկական թատրոնի բեմադրությամբ «Տունը սահմանին» ներկայացումը ոչ միայն հրաշալի արվեստի գործ է, այլև հնարավորություն՝ մշակույթի լեզվով անդրադառնալու ներկայիս հայկական քաղաքական իրականությանը, արժեքներին և ազգի միասնության բացակայությանը։
Թատրոնի՝ արդեն մրցանակակիր աշխատանքը ցույց է տալիս մի թեմայի կարևորություն ու արդիականություն, որը սկիզբ է առնում ժամանակի խորքերից, բայց հատկապես ցավոտ է մեր՝ 2020 թ. կապիտուլյացիայի հետևանքները ամեն օր սեփական մաշկի վրա զգացող հայերիս համար:
ՀԱՍԱՆ ՄԽԻԹԱՐՅԱՆ
