14 հուլիսի, 2024, ԱՄՆ, ԱՇՈՏ ՊՈՂՈՍՅԱՆ
Բաթլերում (Փենսիլվանիա) ԱՄՆ նախագահի թեկնածու Դոնալդ Թրամփի ելույթի ժամանակ հրաձգություն է տեղի ունեցել։
Թրամփի նախընտրական հանրահավաքի հեռարձակման ժամանակ լսվել են կրակոցի ձայներ: Տեսանյութում Թրամփը բռնում է ականջը, իսկ հետո ընկնում գետնին, երբ անվտանգության աշխատակիցները մոտենում են նրան։
Լուսանկարներում և տեսանյութերում երևում էր, թե ինչպես է Թրամփը բղավում ամբոխի մեջ և բարձրացնում բռունցքը, երբ Գաղտնի ծառայության աշխատակիցները նրան դուրս են բերում բեմից:
Հրաձգության մեջ կասկածվողը սպանվել է։ Նա եղել է ոչ թե միջոցառմանը, այլ մոտակայքում գտնվող շենքի տանիքին, CNN-ին հայտնել են իրավապահ մարմինների երկու աղբյուրներ: Հեռուստաալիքի մի քանի զրուցակիցներ նրան դիպուկահար են անվանել։ Բաթլերի շրջանային դատախազ Ռիչարդ Գոլդինգերը հաստատել է, որ զինված անձը տանիքում է եղել և կրակել է «մի քանի հարյուր յարդից»: «Դրա համար ձեզ պետք է հրացան»,- ասել է նա։
Դատախազը հայտնել է նաև, որ հանրահավաքի մասնակիցներից մեկը մահացել է, հայտնում է Associated Press-ը։
Ներկայումս կատարվում է հետաքննություն։
Թրամփի խոսնակ Սթիվեն Չունգը հայտնել է, որ նախագահի թեկնածուն «լավ է» և հետազոտվում է տեղի բժշկական հաստատությունում։
«Նախագահ Թրամփը շնորհակալություն է հայտնում իրավապահ մարմիններին և առաջին արձագանքողներին այս զազրելի արարքի ժամանակ նրանց արագ գործողությունների համար», - մեջբերում է The New York Times-ը Թրամփի խոսնակի խոսքերը:
Միջադեպի առնչությամբ բերման ենթարկվածների մասին պաշտոնական տեղեկություն դեռ չկա։
Սպիտակ տունը հայտնել է, որ Ջո Բայդենը տեղեկացված է միջադեպի մասին. նա դեռ հրապարակավ չի մեկնաբանել կատարվածը։
ԱՄՆ երկու խոշոր կուսակցությունների քաղաքական գործիչները հանդես են գալիս Թրամփին սատարող և քաղաքական բռնությունը դատապարտող հայտարարություններով։
