Ռուս ուղղափառ եկեղեցու կատարյալ խայտառակության օրը
05.05.2025
Քաղաքական հնչեղությամբ «օրհնություն» ստանալն այս օրերին դարձել է դիվանագիտական նոր կարգավիճակ՝ երբ կաթոլիկից ավելի կաթոլիկ ես, իսկ ուղղափառից՝ ուղղափառ։ Հենց այս կերպ կարելի է նկարագրել Ռուսաստանի ամենաբարձր աստիճանի հոգևորական Կիրիլի որոշումը՝ սուրբ Օլգայի շքանշանով պարգևատրել Ադրբեջանի առաջին տիկին Մեհրիբան Ալիևային։
Այո, ճիշտ կարդացիք։ Կինը, որն ամուսնու հետ պաշտոնապես ղեկավարում է երկիր, որտեղ տասնամյակներ շարունակ ջախջախվում են քրիստոնեական եկեղեցիները, ցեղասպանվում են քրիստոնյաները, այսօր արժանանում է ուղղափառ աշխարհում բարձրագույն պարգևներից մեկին։ Ռուսական եկեղեցին՝ պատրիարք Կիրիլի գլխավորությամբ, վաղուց այլևս հոգևոր կառույց չէ, այլ քաղաքական գործիքի վերածված հաստատություն, որը փոխանակ ծառայելու բարոյական արժեքներին ու ճշմարտությանը, օրհնում է բռնապետերին, արդարացնում պատերազմներն ու վարձատրության շքանշաններ է բաժանում նավթադոլարներով սնվող կեղծ «հումանիզմի» ջատագովներին՝ սրբության դիմակի տակ թաքցնելով համատարած կործանարար կեղծավորությունը։
Հնարավոր է նաև՝ դա ռուս պատրիարքի էկզոտիկ սիրո արձագանք է Բաքվի՝ «բոլոր կրոնների օրրան» կերպարին, որն այսօր առաջ է մղվում ադրբեջանական քարոզչամեքենայով՝ ինչպես գունագեղ փաթեթով շոկոլադ՝ առանց փակցված թուղթը կարդալու։
Արդեն ոչ միայն Կիրիլ պատրիարքն է այցելում կամ պարգևներ բաժանում։ Շուտով Բաքու է ժամանելու Իսրայելի վարչապետը։ Կատարյալ կրոնական համադասարան։ Միայն Դալայ Լաման է դեռ բացակայում, բայց հաշվի առնելով Ադրբեջանի նոր կրոնական թափը՝ գուցե նա էլ շուտով շտապի դեպի Բաքու։
Խաչը, կիսալուսինը, Դավթի աստղը, բուդդայական աղոթքի թմբուկը և սրբազան նավթը՝ բոլորը հավաքված են մեկ տեղում։ Ո՞ւմ է պետք Սուրբ Գողգոթան, երբ կա Բաքու՝ սրբազան երկխոսության, նեոֆիթ-հումանիզմի ու նավթային հոգևոր վերածննդի գլխավոր բեմը։
Երբ սրբությունը դառնում է վարկանիշ բարձրացնելու գործիք, իսկ հավատը՝ դեկոր քաղաքականության բեմում, ապա այս շքանշանները այլևս պարգև չեն, այլ՝ դիմակներ։ Իսկ դիմակներով խաղացող դերասաններն այսօր հերթ են կանգնել Բաքվի բեմահարթակին։
Ի վերջո, միայն մեկ հարց է մնում։ Երբ կտեսնենք Ալիևին՝ վանական հանդերձանքով, ընթերցելիս Թալմուդը, Ավետարանն ու Ղուրանը՝ միաժամանակ։ Այդ ժամանակ բոլոր կասկածները կվերանան՝ Բաքուն իսկապես վերածվել է կրոնական նոր Մեծ Պարսպի։ Ուրախացե՛ք, հավատացյալներ ողջ աշխարհից։ Ձեր ապագան Բաքվում է։
ԱՇՈՏ ՊՈՂՈՍՅԱՆ
