Նա հայրենիքին օգնության հասավ ամենածանր պահին. Քըրքորյանի ծննդյան օրը հիշում ենք նրա պատմությունը
06.06.2023
Հայաստանի ազգային հերոս, ամերիկահայ մեծ բարերար Քըրք Քրքորյանի ծննդյան օրն է այսօր: Նա մի մարդ էր, որն իր հայրենիքին օգնության եկավ ամենածանր օրերին և նշանակալի հետք թողեց մարդկանց գիտակցության մեջ՝ իբրև նվիրվածության, անշահախնդրության ու ազնվության եզակի օրինակ:
Գրիգոր Ահարոնի Գրիգորյանը, ով, որպեսզի իր անունն ավելի հեշտ արտաբերելի դառնա, հետագայում սկսեց ստորագրվել իբրև Քըրք Քըրքորյան, ծնվել է 1917 թ. 19–րդ դարի վերջին Խարբերդից Ֆրեզնո գաղթած Ահարոն Գրիգորյանի ընտանիքում։ Մինչև 1935-ը կատարել է զանազան աշխատանքներ, եղել է պրոֆեսիոնալ բռնցքամարտիկ։ Այնուհետև սովորել է օդաչուական դպրոցում, դարձել օդաչու-հրահանգիչ։ Որպես ռազմաօդային ուժերի օդաչու մասնակցել է Երկրորդ համաշխարհային պատերազմին, որի ավարտից հետո զբաղվել է օդանավերի բաժնեթղթերի առևտրով՝ 1947-ին գնել է Los Angeles Air Service փոքրիկ չարտերային ավիաընկերությունը, ինչպես նաև հյուրանոցային բիզնեսով։ Կառուցել է Լաս Վեգասի «Ֆլամենգո», «Էմ Ջի Գրանդ» և այլ խոշոր հյուրանոցներ։ 1968-ից զբաղվել է կինոարտադրությամբ, «Մետրո Գոլդվին Մայեր» և «Յունայթեդ Արտիստս» կինոստուդիաների, «Էմ Ջի Էմ Միրաժ» կորպորացիայի հիմնադիր բաժնետերն է։ Եղել է «Քրայսլեր Քորփորեյշնի» բաժնետեր։
Անկախ Հայաստանի հիմնադրման առաջին տարիներից Հայաստանին աջակցած գործարարը բարեգործական ամենամեծ ծրագիրն իրականացրեց իր հիմնած «Լինսի» հիմնադրամի միջոցով։ Քըրքորյանի նվիրաբերած միլիոններով Հայաստանում նորոգվեցին հարյուրավոր կիլոմետր երկարությամբ ճանապարհներ, տասնյակ դպրոցներ, մշակութային հաստատություններ, կառուցվեցին բնակարաններ աղետի գոտու բնակիչների համար:
2000-ականներին մամուլը շատ էր գրում այն մասին, որ նրա գումարները Հայաստանում անարդյունավետ են ծախսվում ու յուրացվում են: «Լինսի» հիմանդրամը 2011-ին դադարեցրեց իր գործունեությունը Հայաստանում: Սա տարատեսակ մեկնաբանությունների և ասեկոսեների տեղիք տվեց, թե Քըրքորյանը հիասթափված է իր միջոցների ոչ նպատակային վատնումից կամ փոշիացումից:
Հայազգի մեծահարուստը ամերիկյան բիզնեսի հայտնի դեմքերից էր, նաեւ «ամերիկյան երազանքի» մարմնացումներից ու խորհրդանիշներից մեկը:
Քըրքորյանի մահով Հայաստանի կորուստը մեծ էր, սակայն ամենեւին ոչ այն պատճառով, որ նա օգնում էր Հայաստանին ֆինանսապես եւ դա կարող էր այլեւս չլինել: Խնդիրը միայն դա չէր:
Քըրքորյանը համաշխարհային մասշտաբի հայի խորհրդանիշ էր, հայի, որն իրենց կարողացել է դրսեւորել համաշխարհային մրցակցությունում, հասնել ձեռքբերումների, դիրքի: Ընդ որում, այդ ամենը ոչ թե ընկել է օդից ինչ որ պահից, ոչ թե տեղի է ունեցել պետական ու հանրային ռեսուրսների մսխման հաշվին, այլ ձեռք է բերվել տարիների տքնաջան աշխատանքով, սկսած մանուկ հասակից:
Քըրքորյանն իր մտքի, աշխատասիրության, համառության, կամքի շնորհիվ քայլ առ քայլ բարձրացել է, բիզնեսի աշխարհում հասնելով իրապես մեծ նվաճումների: Այդ ամենով հանդերձ, նա իր մեջ կրել է նաեւ պետականության զգացումը, հայկական պետության համարժեք պատկերացումը, ինչի մասին է վկայում նաեւ Հայաստանին տրամադրած նրա ֆինանսական օգնության այսպես ասած թիրախային ուղղությունները:
Այդ իմաստով, Քըրքորյանը նախ եւ առաջ օրինակ էր՝ մասշտաբային մտածողության, աշխատասիրության, կամքի, հետեւողականության օրինակ:
Քըրքորյանը Հայաստանի համար անհրաժեշտ էր առաջին հերթին հենց որպես այդ օրինակը, հետո որպես մեծահարուստ և բարերար:
