Աշխարհի բազմակի չեմպիոն ու ռեկորդակիր Յուրի Սաքունցը ժամանել է ԱՄՆ՝ հայկական անունով նոր բարձունքներ նվաճելու. Yerevan Online Mag.-ը պատմում է նրա անցած ճանապարհի, ռեկորդների և նոր մեկնարկի մասին
9 ՀՈԿՏԵՄԲԵՐԻ, 2026, ԱՇՈՏ ՊՈՂՈՍՅԱՆ, ԼՈՍ ԱՆՋԵԼԵՍ, YEREVAN ONLINE Mag.-ի ԱՄՆ ԹՂԹԱԿԻՑ
Հոկտեմբերի 8-ին Յուրի Սաքունցը ժամանեց Միացյալ Նահանգներ։ Գինեսի ռեկորդակիր, ուժային եռամարտի աշխարհի կրկնակի չեմպիոն և բռնցքամարտի չեմպիոնական մի քանի գոտիներ նվաճած հայ մարզիկն առաջին անգամ է Ամերիկայում։ Եկել է նոր մենամարտերի ու նոր ռեկորդի համար։
Այցը կայացել է գործարար Սարգիս Թադևոսյանի նախաձեռնությամբ։ Նրանց համագործակցությունն սկսվել է երկու տարի առաջ։ Այդ ժամանակից Սարգիսը, ով այստեղ ավելի շատ «Արաբո Սաքո» անունով է հայտնի, պահել ու առաջ է տարել Սաքունցին ամերիկյան ասպարեզ հասցնելու գաղափարը։ Աջակցել է նրա կարիերային, աշխատել այցը հնարավոր դարձնելու համար։ Հոկտեմբերի 8-ին երկու տարվա մտահղացումն իրականացավ։
Թադևոսյանը Արցախյան առաջին պատերազմի ազատամարտիկ է, «Արաբո» ջոկատի հերոսական մարտական կենսագրության կրողներից։ Ապրում է հայրենիքից հեռու, շարունակում է նրա կողքին լինել։ Սաքունցին տրված աջակցությունը նրա հայրենասիրության գործնական կողմն է՝ հայ տաղանդին օգնել հասնելու այնտեղ, որտեղ կարող է մրցել, ներկայանալ ավելի մեծ լսարանի և բարձրացնել Հայաստանի դրոշը։
Այս գործում Թադևոսյանի ուժը հետևողականությունն է։ Նա հավատացել է մարզիկին և երկու տարի պահել այդ հավատը աշխատանքի մեջ։ Սաքունցի առաջին ամերիկյան այցն արդեն կայացել է։ Մարզիկն իր երախտագիտությունը հասցեագրում է անունով։ Yerevan Online Mag.-ի հետ զրույցում նա ասաց.
«Առայժմ շրջապատված եմ հայերով։ Շատ գեղեցիկ, շատ հաճելի զգացողություններ ունեմ։ Բոլորն ինձ շատ լավ են վերաբերվում, առաջին հերթին՝ Սարգիս Թադևոսյանը, որի շնորհիվ հիմա այստեղ եմ։ Ես շատ շնորհակալ եմ նրանց այս հնարավորության համար և այն բանի համար, որ այստեղից՝ ԱՄՆ-ից, միշտ Հայաստանի կողքին են եղել, իմ կողքին են եղել և օգնում են իմ չեմպիոնական ու ռեկորդային կարիերայի զարգացմանը»։
Դեռ 2025 թվականի հունիսին, Բանգկոկում չեմպիոնական գոտի նվաճելուց հետո, Սաքունցը հաղթանակը նվիրել էր «Արաբո»-ի հերոսներին և հրապարակավ շնորհակալություն հայտնել Սարգիս Թադևոսյանի գլխավորած հայրենասեր աջակիցներին։ Այդ համագործակցությունը շարունակվել է մինչև ամերիկյան այցը։
Սաքունցը մեծացել է մարզական ընտանիքում։ Նրա հայրը՝ Նիկոլայ Սաքունցը, ԽՍՀՄ կրկնակի և Հայաստանի քառակի չեմպիոն է, միջազգային կարգի սպորտի վարպետ։ Յուրին 2002 թվականից ըմբշամարտով է զբաղվել նրա մոտ։ Վեց տարեկանում Աբովյանի մարզային առաջնությունում ստացել է իր առաջին մեդալը՝ երկրորդ տեղի համար։ Ըմբշամարտին տվել է տասը տարի, ապա անցել մասռեսլինգին ու ուժային եռամարտին։ Դարձել է ուժային եռամարտի աշխարհի կրկնակի և Եվրոպայի չեմպիոն։
Նրա վաղ ուժային նվաճումներից են երեք ֆուտբոլային գնդակների վրա կատարվող հենում-ծալումները։ Կրծքին 40 կիլոգրամ ծանրություն պահած՝ կատարել է նաև որովայնի մկանների վարժություն՝ 130 կրկնությամբ։ Այս կատարումներում ծանրության հետ պետք է պահել մարմնի հավասարակշռությունը։ Սաքունցի կարողությունների մեջ այդ ճշգրտությունը նույնքան տպավորիչ է, որքան ուժը։
Ճկույթով քաշելու մարզումները սկսել է մեկ տոննա կշռող մեքենաներից։ Սկզբում նույնիսկ տասը սանտիմետր չէր կարողանում դրանք առաջ շարժել։ Հաղթահարել է այդ ծանրությունը, ավելացրել հաջորդը։ 2019 թվականին պատմել է, որ մարզումներին օրական երեքից չորս ժամ է տրամադրում, ուսումնասիրում տարբեր մարզաձևեր։ Սիրում է նաև գիրք կարդալ։
2018 թվականին ճկույթով տեղաշարժել է 44 տոննա կշռող գնացք։ 2019 թվականի մարտի 4-ին ատամներով քսան մետր քաշել է 25 տոննա կշռող հրշեջ մեքենա։ Նրա ընտրած ծանրություններն աճել են տարիների աշխատանքի հետ։
2020 թվականի սեպտեմբերի 2-ին Ստեփանակերտի Ստեփան Շահումյանի անվան մարզադաշտում ձեռքերի վրա քայլելով քաշել է 4 տոննա 100 կիլոգրամ կշռող «Համմեր»։ Ոտքերն օդում էր պահում, ճոպանը՝ ատամներով։ Մի քանի բառով նկարագրվող այս կատարումը մարդու մարմնից պահանջում է բացառիկ ուժ ու վերահսկում։ Սաքունցը նվաճումը նվիրել է Արցախի Հանրապետության օրվան։ Այդ ժամանակ արդեն Հայաստանի «Դյուցազնագրքի» 17-ակի և Գինեսի կրկնակի ռեկորդակիր էր։
2021 թվականի մայիսի 29-ին Երևանի Շահումյանի հրապարակում ճկույթով տեղաշարժել է 13 տոննա կշռող, տասներկու մետր երկարությամբ ավտոբուս։ Ճկույթին հավելյալ տասը կիլոգրամ ծանրաքար էր ամրացված։ Նվաճումը նվիրել է հայ զինվորին։ Բանակը նրա կենսագրության մեջ էլ իր տեղն ունի․ Սաքունցն ապրիլյան պատերազմի մասնակից է։
2022 թվականի հունիսի 16-ին ատամներով քաշել է ընդհանուր 37,5 տոննա կշռող երկու հրշեջ-փրկարարական մեքենա։ Օգոստոսի 4-ին Երևանի մետրոպոլիտենի հավաքակայանում մեկ ճկույթով քսան մետր տեղաշարժել է երկու վագոն։ Դրանց ընդհանուր քաշը 65 տոննա էր։ Ինքը կշռում էր 65 կիլոգրամ։ Մեկ ճկույթով շարժել է սեփական մարմնի քաշից հազար անգամ ծանր վագոնները։ Այդ օրը նրա հաշվարկում արդեն 23 հայկական և յոթ համաշխարհային ռեկորդ կար։
2023 թվականի մարտի 29-ին Վազգեն Սարգսյանի անվան ռազմական համալսարանում ատամներով տասը մետր քաշել է բեռնատարն ու դրա քարշակին տեղադրված հետևակի մարտական մեքենան՝ ընդհանուր 40 տոննա ծանրությամբ։ Ռեկորդը նվիրել է հայոց բանակին։ 2025 թվականի մարտին ճկույթով տեղաշարժել է ուղղաթիռ։ Եղբայրը՝ Արթուր Սաքունցը, ուղղաթիռը քաշել է ատամներով։ Ընտանեկան մարզական համբավը շարունակվում է երկու եղբայրների անուններով։
Սաքունցը հայ մարզաշխարհի հազվագյուտ կարողություններով մարզիկներից է։ Նրա ուժային կատարումներին գումարվել են պրոֆեսիոնալ բռնցքամարտի հաղթանակները։ Ռինգում ծանր մեքենային փոխարինում է մրցակիցը՝ սեփական արագությամբ, հարվածով ու պաշտպանությամբ։ Սաքունցն այնտեղ էլ հասել է չեմպիոնական գոտիների։
UBO-ի պաշտոնական մարզիկի տեղեկագրում նրա նվաճումների թվում նշված են 2024 թվականի WBU-ի և 2025 թվականի GBC-ի առաջին միջին քաշային կարգի աշխարհի չեմպիոնական կոչումները։ 2025 թվականի հունիսի 7-ին Բանգկոկում երկրորդ ռաունդում տեխնիկական նոկաուտով հաղթել է թաիլանդացի Պադյոդ Կիադչարոենսիրիին և նվաճել WBC Asia-ի միջին քաշային կարգի գոտին։ WBC-ի ասիական կառույցի հաղորդագրությունը նկարագրում է նրա հարվածների ուժն ու մրցակցի նկատմամբ շարունակական ճնշումը։
Նույն տարվա նոյեմբերի 23-ին Թաիլանդում հաղթել է փորձառու Պիպատ Չայպորնին և նվաճել UBO-ի առաջին միջին քաշային կարգի աշխարհի չեմպիոնական կոչումը։ Այդ հաղթանակից հետո կազմակերպությունը նրա արդյունքը գրանցել է՝ քսան հաղթանակ, ոչ մի պարտություն։ Փայլուն արդյունք՝ մի մարզիկի համար, որը հայտնի էր նաև իր ուժային ռեկորդներով։
2026 թվականի ապրիլի 18-ին Ավստրիայում Սաքունցը հաղթել է Գերմանիան ներկայացնող Ռոբերտ Տլատլիկին և տիրացել WBO Europe-ի չեմպիոնական գոտուն։ WBO-ի եվրոպական պաշտոնական ցանկում առաջին միջին քաշային կարգի՝ մինչև 69,85 կիլոգրամի Եվրոպայի չեմպիոնը Յուրի Սաքունցն է։ Անվան կողքին՝ Հայաստանը։ Սեպտեմբերի 28-ի համաշխարհային վարկանիշում նա նույն քաշային կարգի 13-րդ տեղում է։
Մեր զրույցում Սաքունցը խոսում է այս նվաճման մասին․ երեսուն տարվա ընթացքում առաջին հայ բռնցքամարտիկն է, որը նվաճել է WBO-ի վարկածով Եվրոպայի չեմպիոնական կոչումը։ Մոտ վեց ամիս առաջ ստացած գոտին նրա մարզական կենսագրության կարևորագույն արդյունքներից է։ Ամերիկա եկել է արդեն այդ անունով ու մակարդակով։
Ինքն իրեն ներկայացնում է կարճ՝ բռնցքամարտիկ, բազմաթիվ ռեկորդների հեղինակ, բազմակի չեմպիոն Յուրի Սաքունց։ Հետո խոսքը դարձնում է իրեն օգնած մարդկանց։
«Շնորհակալ եմ բոլոր նրանց, ովքեր իմ կողքին են եղել, ովքեր մնում են իմ կողքին, ովքեր օգնել են ինձ։ Կարևոր չէ՝ ֆինանսապես, թե հոգեպես։ Եվ շատ շնորհակալ եմ իմ ժողովրդին, որը միշտ իմ կողքին է եղել, որպեսզի կարողանամ հայկական դրոշը շատ բարձր ծածանել»։
Հաջորդ ուժային նպատակը մեքենաների մի ամբողջ շարասյունն ատամներով քաշելն է։ Մոտավոր ժամկետը մեկ ամիս է։ Ծրագրում կան նաև մենամարտեր Լաս Վեգասում ու այլ քաղաքներում։
«Աստծո օրհնությամբ հիմա գնում եմ դեպի նոր համաշխարհային ռեկորդ, որը կլինի մոտավորապես մեկ ամսից։ Պատրաստվում եմ ատամներով մեքենաների շարասյուն քաշել։ Դա կլինի նոր համաշխարհային ռեկորդ։ Կլինեն նաև մի քանի մենամարտեր Լաս Վեգասում և այլ քաղաքներում։ Աստծո օգնությամբ կգնանք դեպի նոր ռեկորդներ ու նոր չեմպիոնական տիտղոսներ»։
Թադևոսյանը Սաքունցին օգնել է պահպանել ձեռք բերած մարզական բարձր մակարդակը և հասնել Ամերիկա, որտեղ նա կարող է ավելի մեծ լսարանի առջև ցուցադրել Հայաստանում զարգացրած կարողություններն ու շարունակել առաջ գնալ։
Զրույցում Յուրին խոսում է նաև հայրենիքից հեռանալու դժվարության մասին։ Ամերիկա հասնելու ուրախության մեջ այդ կապվածությունն էլ կա։
«Ինձ համար շատ դժվար էր լքել հայրենիքս ու գալ։ Ես շատ կապված եմ այդ ջրի ու հողի հետ։ Երազում եմ խաղաղության մասին՝ Հայաստանում և ամբողջ աշխարհում, և ուզում եմ, որ հայերը միասնական լինեն»։
Նոր ռեկորդների ու մենամարտերի նպատակը բացատրում է մեր ժողովրդին բաժին հասած պարտությունները հիշելով։
«Ես ամեն հնարավոր բան կանեմ, որպեսզի մեր ժողովրդին բաժին հասած բազմաթիվ պարտություններից հետո հայկական ազգանունը շատ հպարտ հնչի, որպեսզի մեր անունը շատ բարձր հնչի ամբողջ աշխարհում»։
