ԱՄՆ-ի գաղտնի դիվանագիտությունը Կովկասում. Թրամփի բանագնացը Մոսկվայից մեկնել է Բաքու՝ իբրև համակարգված քայլ Իսրայելի, ԱՄՆ-ի և Ադրբեջանի կողմից

15.03.2025

ԱՄՆ նախագահ Դոնալդ Թրամփի հատուկ բանագնաց Սթիվ Ուիթքոֆն ուրբաթ առավոտյան վայրէջք է կատարել Ադրբեջանի մայրաքաղաքում՝ Մոսկվայից կատարված գիշերային այցից հետո։ Իսրայելական The Jerusalem Post պարբերականը սա դիտարկում է որպես դիվանագիտական ​​լավ համակարգված քայլ ԱՄՆ-ի, Իսրայելի և Ադրբեջանի միջև։

Ռուսական РИА Новости գործակալության փոխանցմամբ, Ուիթքոֆի ինքնաթիռը Մոսկվայի «Վնուկովո» օդանավակայանից օդ է բարձրացել գիշերվա մոտ 02:00-ին և մի քանի ժամ անց ժամանել է Բաքու։

Իսրայելա-ադրբեջանական հարաբերությունների մասնագետների կարծիքով՝ այցի կազմակերպումը զգալիորեն ակտիվացել է մարտի 5-ից հետո, երբ Իսրայելի վարչապետ Բենիամին Նեթանյահուն Կնեսետում վերահաստատել է երեք երկրների միջև գործընկերության կարևորությունը։

Բացի այդ, Թրամփին ուղղված ավագ ռաբբիների նամակը, որը կոչ էր անում ընդլայնել Աբրահամի համաձայնությունները և ամրապնդել ԱՄՆ-ի, Իսրայելի ու Ադրբեջանի միջև ռազմավարական համագործակցությունը, մեծ արձագանք է ստացել քաղաքական և դիվանագիտական շրջանակներում։ Համարվում է, որ այդ նամակն ազդեցություն է ունեցել Ուիթքոֆի այցի կազմակերպման վրա։

Դիվանագիտական ​​հանրությունը ուշադիր հետևում է Բաքվում զարգացող իրադարձություններին՝ ակնկալելով տեսնել, թե ինչպես կզարգանան այս եռակողմ հարաբերությունները և արդյոք Ադրբեջանը կկատարի իր ենթադրյալ միջնորդական դերը։