Էրդողանն ասել է, որ Թուրքիան կարող է մտնել Իսրայել «ինչպես Լիբիա և Լեռնային Ղարաբաղ». Իսրայելի ԱԳՆ-ն նրան համեմատել է Սադամ Հուսեյնի հետ
29.07.2024
Թուրքիան կարող է մտնել Իսրայել, ինչպես դա արեց անցյալում Լիբիայում և Լեռնային Ղարաբաղում, ասել է Ռեջեփ Թայիփ Էրդողանը։ Այսպես, Թուրքիայի նախագահը մեկնաբանել է Գոլանի բարձունքների վրա հարձակումից հետո Լիբանանի և Իսրայելի միջև իրավիճակի վատթարացումը։
«Մենք պետք է ուժեղ լինենք, որպեսզի Իսրայելը չկարողանա անել այս սարսափելի բաները Պաղեստինին։ Ինչպես մենք մտանք Ղարաբաղ, այնպես, ինչպես մտանք Լիբիա, նույնը կարող էինք անել նրանց հետ»,- ասել է Էրդողանը Ռիզե քաղաքում իր իշխող կուսակցության հանդիպման ժամանակ: Թուրքիայի նախագահը հավելել է, որ «ոչ մի պատճառ չկա, թե ինչու մենք չկարողանանք դա անել»։
Իսրայելի արտաքին գործերի նախարար Իսրայել Կացը պատասխանել է, որ Էրդողանը Իսրայելի վրա հարձակվելու սպառնալիքներով «գնում է Սադամ Հուսեյնի հետքերով»: «Պարզապես թող նա հիշի, թե ինչ կատարվեց այնտեղ և ինչպես ավարտվեց», - գրել է Կացը:
Թուրքիայի ԱԳՆ-ն իր հերթին Իսրայելի վարչապետ Բենիամին Նեթանյահուին համեմատել է Ադոլֆ Հիտլերի հետ։ «Ինչպես ավարտվեց Հիտլերի ցեղասպանությունը, կավարտվի նաև Նեթանյահուի ցեղասպանությունը. Ինչպես նացիստներին կանգնեցրին պատասխանատվության, այնպես էլ նրանք, ովքեր փորձեցին ոչնչացնել պաղեստինցիներին, նույնպես պատասխանատվության կենթարկվեն», - ասվում է թուրք դիվանագետների հայտարարության մեջ X սոցիալական ցանցում:
Շաբաթ օրը՝ հուլիսի 27-ին, Իսրայելի Գոլանի բարձունքներում գտնվող Մաջդալ Շամս գյուղի ֆուտբոլի դաշտի վրա հրթիռակոծության հետևանքով զոհվել է 12 երեխա և դեռահաս։ Եվս մի քանի վիրավորներ շարունակում են մնալ ծանր վիճակում։ Իսրայելի պաշտպանության բանակը հայտարարել է, որ հարվածը հասցվել է իրանական հրթիռով, և որ հարձակման հետևում կանգնած է լիբանանյան Հեզբոլլահը: Խմբավորումը հերքում է իր առնչությունը հարձակմանը, սակայն հարվածից քիչ առաջ Հեզբոլլահը հայտնել է Մաջդալ Շամսի մոտ գտնվող ռազմաբազայի հրթիռակոծման մասին: Սպիտակ տունը նաև մեղադրել է Հեզբոլլահին Գոլանի բարձունքների վրա հարձակման համար։
Իսրայելի վարչապետ Բենիամին Նեթանյահուն, վերադառնալով ԱՄՆ կատարած այցից, կիրակի երեկոյան իր ռազմական կաբինետի նիստ է անցկացրել՝ Գոլանի բարձունքների վրա հարձակմանը Իսրայելի արձագանքը մշակելու համար: Նիստից հետո կաբինետի անդամները լիազորել են վարչապետին և պաշտպանության նախարարին «որոշել «Հըզբոլլահի» դեմ պատասխան տալու ընթացակարգը և ժամանակը։
