Սկզբունքային, պրոֆեսիոնալ, պետականամետ. Գագիկ Եգանյանի հիշատակին
16.01.2026
Գագիկ Եգանյանը այն քիչ պետական գործիչներից էր, որոնց մասին կարելի է խոսել առանց վերապահումների՝ որպես սկզբունքային, պրոֆեսիոնալ և պետականամետ մարդու։ Նրա անվան հետ է կապված ոչ միայն բարձր պատասխանատվությամբ ծառայությունը, այլև կառույց ձևավորելու ու այն բարձր չափանիշի հասցնելու կարողությունը. փաստացիորեն նա հիմնեց և կայացրեց միգրացիոն ծառայությունը՝ դարձնելով այն արդյունավետ և վստահելի համակարգ։
Նա ազնվական մարդ էր՝ ոչ միայն ծագումով, այլ առավելապես տեսակով ու որակներով։ Իր խոսքի մեջ կար չափ, իր գործի մեջ՝ ճշտություն, իր վերաբերմունքի մեջ՝ արժանապատվություն։ Այդ հազվագյուտ համադրությունն է, որ նրան առանձնացնում էր՝ դարձնելով յուրահատուկ երևույթ իր ժողովրդի մեջ։
Գագիկ Եգանյանը նաև կյանքի հանդեպ ուժեղ, գործնական և ակտիվ վերաբերմունքի օրինակ էր։ Բավական հասուն տարիքում սկսեց զբաղվել պրոֆեսիոնալ լեռնագնացությամբ՝ նոր բարձունքներ նվաճելով նույն կարգապահությամբ ու համառությամբ, որով աշխատում էր պետական համակարգում։ Ֆիզիկապես ակտիվ էր, ներքուստ՝ ամուր, և այդ ամրությունը զգացվում էր նրա ներկայությունից։
Նա հեռացավ շատ երիտասարդ տարիքում՝ ընդամենը 69 տարեկան։ Բայց կան մարդիկ, որոնց տարիքը չափվում է ոչ թե տարիներով, այլ թողած հետքով՝ գործով, մարդկայնությամբ, սկզբունքայնությամբ։ Գագիկ Եգանյանն այդ մարդկանցից էր։
Ցավակցում ենք նրա ընտանիքին, հարազատներին, ընկերներին ու բոլոր նրանց, ովքեր ճանաչել են նրան և գնահատել նրա մարդը լինելու կերպը։
