Վայոց Ձորի մարզում ինչ-որ մեկը ջարդուփշուր է արել 13-րդ դարի խաչքարը. ԿԳՄՍՆ-ն մեղադրում է կայծակին
Ինչը կասկածելի է թվում
23.06.2023
Վայոց ձորի մարզում 13-րդ դարի խաչքարը բառացիորեն բեկորների է վերածվել։
Հուշարձանը գտնվում է մարզի՝ սահմանից ոչ հեռու գտնվող Կարմրաշեն վարչական շրջանում: Վնասված խաչքարը նկատել են ԿԳՍՄՆ պատմական միջավայրի պահպանության Վայոց ձորի մարզի աշխատակիցները շրջայցի ժամանակ:
ԿԳՍՄՆ-ն շտապում է հայտարարել, որ խաչքարը ոչնչացրել է կայծակը:
Այս հայտարարությունը, թե կայծակն ամբողջությամբ քանդել և փոքր բեկորների է վերածել ահռելի խաչքարը, կասկածելի է թվում։ Կայծակը կարող է ճաք առաջացնել կամ վնասել քարը, սակայն այն բեկորների վերածելու համար անհրաժեշտ է զգալի ազդեցություն կամ լրացուցիչ գործոններ:
Ուստի պետք է դիտարկել խաչքարի ոչնչացման այլ հնարավոր պատճառներ։ Ինչո՞ւ է ԿԳՄՍՆ-ն շտապում ենթադրություններ անել՝ առանց վանդալիզմի վարկածը պատշաճ քննելու, առավել ևս, երբ տեղանքը սահմանամերձ է:
Այս պատմական հուշարձանի ոչնչացման ճշգրիտ պատճառը պարզելու համար կարևոր է մանրակրկիտ հետազոտություն և փորձաքննություն անցկացնել: Ձեռք բերված տվյալների և արդյունքների հիման վրա հնարավոր կլինի ձեռնարկել անհրաժեշտ միջոցառումներ այլ խաչքարերի պաշտպանության ուղղությամբ՝ Հայաստանի հարուստ ժառանգությունը պահպանելու համար։
Փոխարենը հաղորդագրության մեջ նման դատարկաբանության ենք հանդիպում.«ՀՀ ԿԳՄՍՆ «Պահպանության ծառայություն» ՊՈԱԿ-ը մասնագետների հետ քննարկում է խաչքարի հետագա ճակատագիրը»:
