Wizz Air-ը ինքնաթիռների բազա է հիմնում Երևանում ու մեկնարկում է ութ նոր չվերթ

07.05.2025

Հունգարական Wizz Air ավիաընկերությունը 2025 թվականի հոկտեմբերի 1-ից կբացի բազա Երևանում՝ տեղակայելով երկու օդանավ Հայաստանի մայրաքաղաքում։ Այս մասին հայտնել է ընկերության հայաստանյան գործունեության պատասխանատու՝ Ռոլանդ Տիշները։

Բազայի բացումը կնշանավորի նաև ութ նոր ուղղությունների գործարկում Երևանից, որոնք կապահովեն ուղիղ օդային կապ Հայաստանի և հետևյալ քաղաքների միջև՝

• Պրահա

• Համբուրգ

• Նիցցա

• Պաֆոս

• Նեապոլ

• Բուխարեստ

• Բարի

• Մեմինգեն

Չվերթների տոմսերի գները սկսվում են 29,99 եվրոյից, առավելագույն գինը՝ 49,99 եվրո։

Տիշները հայտարարել է նաև, որ Wizz Air-ը դիտարկում է հնարավորություններ՝ Հայաստանում գործունեության ընդլայնման համար, ներառյալ՝ չվերթների կատարում Գյումրիի օդանավակայանից։

Այժմ Wizz Air-ը արդեն իսկ իրականացնում է չվերթներ Երևանից դեպի Աբու Դաբի, Բուդապեշտ, Վիեննա, Սոֆիա, Միլան, Դորտմունդ, Լառնակա, Հռոմ և Վենետիկ։

Բազայի հիմնումը Երևանում կարևոր ռազմավարական քայլ է, որը խոստանում է էականորեն մեծացնել Հայաստանի օդային հասանելիությունը, խթանել տուրիզմը և տնտեսական կապերը Եվրոպայի հետ։