top of page

Արագածի զարգացման 80 մլրդ դրամանոց մեգա-նախագծին խոչընդոտում են Սարկիսով եղբայրները՝ ֆրանսիացու ազգանունով տոմսավաճառին իբրև ներդրող ներկայացնելով

23.02.2024



«ՌԻԴ» ընկերությունն իր մտահոգությունն ու վրդովմունքն է հայտնում մի շարք իրադարձությունների կապակցությամբ, որոնք բացասաբար են ազդում Արագածում լեռնադահուկային հանգստավայրի կառուցման ծրագրի և Հայաստանի զարգացման այլ ներդրումային ծրագրերի վրա։


2018 թվականից ընկերությունը ներկայացրել է լեռնադահուկային, առողջարանային, հանգստի և մանկական օբյեկտների զարգացման մի շարք նշանակալի նախագծեր, սակայն բախվել է անարդար հանգամանքների և խոչընդոտների։


Մասնավորապես, «ՌԻԴ» ընկերությունը ենթարկվել է կեղծ մրցակցության պատրվակով արդարացվող տեղեկատվական հարձակումների՝ չնայած Արագածի ծրագրի վերաբերյալ կառավարության հետ ստորագրված հուշագրին, որը բացառում է այլ ընկերությունների մասնակցություն այդ նախագծին։ Բոլոր պարտավորությունները «ՌԻԴ» ընկերության կողմից բարեխղճորեն կատարվել են, սակայն համակողմանի աջակցության փոխարեն Հայաստանի տնտեսության մեջ մոտ 80 մլրդ դրամի հասնող ներդրում անելու պատրաստ ընկերությունը բախվել է մի իրավիճակի, երբ դեռևս գաղտնի նախագիծը ենթադրաբար քաղաքաշինության կոմիտեի ներկայացուցիչների թեթև ձեռքով անցել է կասկածելի ծագումնաբանություն ունեցող երրորդ անձանց տրամադրության տակ։


«ՌԻԴ» ընկերությունը բախվել է Արագածի ծրագրի վերաբերյալ կողմնակալ և ակնհայտ կեղծ լուսաբանումների: Որոշակի լրատվական կայքերում հայտարարություններ են տարածվում, թե Պասկալ անունով ոմն ֆրանսիացի ներդրումներ է ցանկացել բերել Հայաստան՝ Արագածում լեռնադահուկային հանգստավայր ստեղծելու համար, իսկ «ՌԻԴ» ընկերությունը, իբր, խանգարել է նրան: Իբրև խեղկատակության գագաթնակետ՝ որպես ծրագրի նախագիծ է ներկայացվում «ՌԻԴ»-ի կողմից վաղուց ներկայացված և զանազան մարմինների քննությանը առնված նախագծի կոսմետիկ փոփոխված տարբերակը:


Հայտնում ենք, որ այս պատմության մեջ ֆրանսիացի ներդրող ներկայացող ինքնակոչ պարոնը՝ Պասկալ անունով, ոչ այլ ոք է, քան քրեական պատմությունների մեջ հայտնված շարքային տոմսավաճառ (skipass) ֆրանսիական Կուրշևել հանգստավայրից և օգտագործվում է Ռուսաստանում ապահովագրական բիզնես ունեցող գործարար Սարկիսով եղբայրների կողմից որպես հայ հասարակությանը մոլորության մեջ գցելու գործիք:


Կոչ ենք անում լրատվամիջոցներին և բլոգերներին արդար և օբյեկտիվ լուսաբանել «ՌԻԴ» ընկերության ծրագրերը՝ ուղղված մեր հայրենիքի զարգացմանը ու բարենպաստ ներդրումային միջավայր ստեղծելուն:




Comments


«Քոչարյանին ասացի՝ ժողովուրդը ձեզ ատում է». Հարութ Սասունյանը՝ Քըրք Քըրքորյանի համեստության, մեր անփառունակ ոչ վաղ անցյալի և վտանգավոր ներկայի մասին | «Զրույցներ հայության մասին»

bottom of page