Իրանի նոր նախագահ է ընտրվել ադրբեջանցի Մասուդ Փեզեշքիանը

6 հուլիսի, 2024, ԹԵՀՐԱՆ

Առողջապահության նախկին նախարար, ռեֆորմիստ Մասուդ Փեզեշքիանը դարձել է Իրանի 9 - րդ նախագահը՝ արտահերթ ընտրությունների երկրորդ փուլում հավաքելով ձայների մոտ 53,6% - ը։ Այս մասին հայտնում է երկրի ներքին գործերի նախարարությունը։

Հաղորդվում է, որ բոլոր 30,530 մլն քվեաթերթիկների մշակման արդյունքներով Փեզեշքիանըհավաքել է 16,384 մլն ձայն՝ ընդհանուր թվի 53,6 տոկոսը:

Հանրապետության Ազգային անվտանգության բարձրագույն խորհրդում Իրանի առաջնորդի ներկայացուցիչ, պահպանողական Սաիդ Ջալիլին ստացելէ 13,538 մլն ձայն՝ 44,3%:

Պաշտոնական տվյալներով՝ ընտրողների մասնակցությունը կազմել է 49,8 տոկոս:

Քվեարկության երկրորդ փուլին, ըստ Իրանի կենտրոնական ընտրական հանձնաժողովի տվյալների, մասնակցել է 30,530 մլն ընտրող (Իրանում ընտրելու իրավունք ունեցող շուրջ 61 մլն մարդուց):

Նախագահական ընտրությունների առաջին փուլում մասնակցությունը կազմել է մոտ 40 տոկոս, ինչը հանրապետության պատմության մեջ ամենացածր ցուցանիշն է:

Նշենք, որ Մասուդ Փեզեշքիանն էթնիկ ադրբեջանցի է։ Նա ծնվել է 1954 թվականի սեպտեմբերի 29-ին Մահաբադ քաղաքում (Արևմտյան Ադրբեջան նահանգ), կրոնական ընտանիքում: Ունի սրտային վիրաբույժի կրթություն, պրոֆեսոր է:

Փեզեշքիանը որպես Իրանի նախագահի թեկնածու գրանցվել է նաև 2013 և 2021 թվականների ընտրություններին։ Առաջին անգամ իր թեկնածությունը հանել է Ալի Աքբար Հաշեմի Ռաֆսանջանիի օգտին, երկրորդ անգամ նրան թույլ չեն տվել ընտրություններին մասնակցել Սահմանադրության պահապանների խորհրդի կողմից։