Թեժ կրքեր Գյումրիում. Մարտուն Գրիգորյանի խաղը, թե՞ Սերժ Սարգսյանի հերթական դավադրությունը Նիկոլ Փաշինյանի օգտին

31.03.2024

ԱՐՄԵՆ ՄԱՐՏԻՐՈՍՅԱՆ, ԳՅՈՒՄՐԻ, YEREVAN ONLINE MAG.

Գյումրիում տեղի ունեցած ընտրություններից հետո քաղաքական լարվածությունը չի թուլանում: Սպասում կա Մարտուն Գրիգորյանի դիրքորոշման շուրջ՝ արդյո՞ք նա կմիանա «ընդդիմադիր» Վարդան Ղուկասյանին, թե՞ կդառնա ՔՊ-ի թեկնածու Սարիկ Մինասյանի աջակիցը:

Սակայն, կա վարկած, որ Գրիգորյանի քաղաքական ուղին վաղուց նախանշված էր, և նրա մասնակցությունն ընտրություններին մեծ հավանականությամբ եղել է Սերժ Սարգսյան-Նիկոլ Փաշինյան տանդեմի ռազմավարության մի մասը:

Մարտուն Գրիգորյանը միշտ էլ եղել է նախկին նախագահ Սերժ Սարգսյանի մերձավոր մարդկանցից մեկը, ինչը չէր կարող անտեսվել այս ընտրությունների ընթացքում: Իրականում, նրա առաջադրումը որպես թեկնածու կարող էր լինել նախկին իշխանությունների հաշվարկված քայլը՝ կանխելու ընդդիմության միավորումը և ՔՊ-ի դեմ պայքարում նրանց հաղթանակի հնարավորությունը:

Ակնհայտ է, որ Գրիգորյանի դիրքորոշումն այս պահի դրությամբ անորոշ է, սակայն նրա թիմակիցների լռությունը, շտաբի դատարկությունը և որոշում կայացնելու ուշացումը վկայում են այն մասին, որ ներքին հակասություններն ավելի խորն են, քան կարող է թվալ առաջին հայացքից:

Իրավիճակը բարդացնում է նաև Մարտուն Գրիգորյանի և Վարդան Ղուկասյանի միջև տարիների թշնամությունը: 2008-ի քաղաքապետական ընտրություններից սկսած՝ նրանց միջև առկա հակամարտությունը ուղեկցվել է արյունալի բախումներով, կրակոցներով և հաշվեհարդարներով, որոնք դարձրել են նրանց հակամարտությունը անզիջում: