Հասմիկ Պողոսյանի կոչը՝ միավորվել և կանգնել Հայ Առաքելական Եկեղեցու պաշտպանության դիրքերում
16.01.2026
2006-2016 թթ. Հայաստանի մշակույթի նախարարությունը ղեկավարած Հասմիկ Պողոսյանի հայտարարությունը.
«Ես՝ որպես Հայաստանի Հանրապետության մշակույթի նախկին նախարար, պարտավորված եմ բարձրաձայնել այն, ինչ այսօր սպառնում է մեր պետության և ժողովրդի հիմնարար արժեքներին։ Վարչապետ Նիկոլ Փաշինյանի կողմից Հայ Առաքելական Եկեղեցու նկատմամբ գործադրվող ճնշումները, ինչպես նաև Ամենայն Հայոց Կաթողիկոսին՝ Գարեգին Բ-ին, հակաօրինական եղանակներով փոխելու փորձերը, ես համարում եմ անթույլատրելի և խիստ վտանգավոր։
Սա ես գնահատում եմ որպես բացահայտ արտաքին պատվեր՝ ուղղված Հայ Առաքելական Եկեղեցու դեմ։ Սա մեր թշնամիների ձեռագիրն է՝ նրանց, ովքեր տարիներ շարունակ փորձել են խոցել մեր ինքնությունը հենց իր հիմքից՝ Եկեղեցուց։ Եվ այսօր այդ պատվերը այստեղ իրականացվում է այն դավաճան հայերի կողմից, ովքեր պատրաստ են ներսից քանդել Հայոց Եկեղեցին, նվաստացնել Վեհափառ Հայրապետին, կոտրել հավատացյալների դիմադրությունը և մեզ թողնել առանց հոգևոր ու ազգային հենասյան։
Հայ Առաքելական Եկեղեցին միայն կրոնական կառույց չէ։ Այն մեր ազգային ինքնության, մշակույթի, պատմական հիշողության և հոգևոր շարունակականության առանցքային հիմնասյունն է։ Եկեղեցու դեմ ուղղված ցանկացած միջամտություն փաստացի հարված է հայ մշակույթին, մեր դարավոր արժեքներին և պետականության բարոյական հիմքերին։
Ես խորապես համոզված եմ, որ պետական իշխանությունը չունի և չի կարող ունենալ իրավունք միջամտելու Եկեղեցու ներքին կյանքին։ Սա ոչ միայն իրավական նորմերի կոպիտ խախտում է, այլ նաև վտանգավոր նախադեպ, որը քայքայում է պետության և հասարակության հիմքերը։
Կոչ եմ անում բոլոր արժանապատիվ հոգևորականներին՝ դադարել լռել։ Հատկապես կոչ եմ անում եպիսկոպոսներին՝ լռության փոխարեն բարձրաձայն կանգնել Հայ Առաքելական Սուրբ Եկեղեցու և Վեհափառ Հայրապետի կողքին։ Այս պահին լռությունը հավասար է եղբայրադավության:
Կոչ եմ անում նաև Հայաստանի մտավորականությանը, մշակույթի գործիչներին, գիտակից և մտածող քաղաքացիներին՝ բոլոր նրանց, ում համար կարևոր են ազգային արժանապատվությունը և մեր հոգևոր ու մշակութային ժառանգությունը, միավորվել և կանգնել Հայ Առաքելական Եկեղեցու պաշտպանության դիրքերում։ Սա պայքար է ոչ միայն Եկեղեցու, այլ մեր ինքնության, մեր մշակույթի և մեր պետականության արժանապատիվ ապագայի համար»:
