Հռոմի Պապ Ֆրանցիսկոսը վերադարձավ Հոր տուն

21.04.2025

Այսօր աշխարհը ողբում է մի մեծ կորուստ՝ Ֆրանցիսկոս Պապը հեռացավ այս աշխարհից։ Նրա մահը, տեղի ունեցած առավոտյան ժամը 7:35-ին, ցնցեց միլիոնավոր սրտեր։ Այսօր մենք հրաժեշտ ենք տալիս մի մարդու, ով կյանքի ողջ ընթացքում ապրեց խոնարհությամբ, կարեկցանքով և հոգևոր ուժով։

Փետրվարից նա գտնվում էր Հռոմի «Ջեմելլի» կլինիկայում՝ բրոնխիտի բուժման և հետագա երկկողմանի թոքաբորբի պատճառով։ Հիվանդանոցում անցկացրած հինգ շաբաթների ընթացքում նա անցավ չորս լուրջ շնչառական ճգնաժամ, երբ նրա կյանքին երկու անգամ սպառնաց մահը։

Կարդինալ Քևին Ֆարրելը, Ծխականների, ընտանիքի և կյանքի հարցերով դիկաստերիայի պրեֆեկտը, իր խոսքում ասաց.

«Նրա ամբողջ կյանքը նվիրված էր Տիրոջը և Նրա եկեղեցուն ծառայելուն։ Նա մեզ սովորեցրեց ապրել Ավետարանի արժեքներով՝ հավատարմությամբ, խիզախությամբ և համընդհանուր սիրով՝ հատկապես աղքատների և կարիքավորների նկատմամբ»։

Ֆրանցիսկոսը դարձավ պատմության մեջ առաջին իեզուիտ Պապը և առաջինը՝ Լատինական Ամերիկայից։ Նրա պաշտոնավարումը նշանավորվեց երկխոսության ձգտումով, աղքատների հանդեպ հոգատարությամբ, շքեղությունից հրաժարումով և խաղաղության կոչերով։

Նա պատմության մեջ մնաց որպես մի Պապ, ով քանդեց պատերը կրոնի և հասարակության միջև։ Նրա խոսքերը հասնում էին ոչ միայն հավատացյալների, այլև նրանց սրտերին, ովքեր երբեք չեն մտել եկեղեցի։ Նրա բարությունը, համեստությունն ու մարդասիրությունը կշարունակեն ներշնչել շատերին։

Հանգչիր խաղաղությամբ, հրաշալի հոգի։ Աշխարհը շնորհակալ է քեզ քո լույսի համար։Դու պարզապես Պապ չէիր՝ դու խղճի ձայն էիր, հույսի խորհրդանիշ և սիրո մարմնացում։

Քո ուղին ավարտված է, և մենք հավատում ենք, որ այժմ դու հանգչում ես Աստծո գրկում: